O flladet e Allahut, o dhembshuritë e Tij

O tërheqjet e së Vërtetës, bujarisht na vizitoni

O shikimet e Allahut, o vështrimet e Tij

O puhizat e butësisë, m’u drejtoni me një frymë

O ndihmë e të Gjithëmëshirshmit, nxito me shpejtësi

Tek ne, dhe zgjidhe nyjën e çdo fatkeqësie

O mëshirë e Zotit Mëshirues, drejtohu nga ne

Dhe ngjall me shpirtin e mirësisë çdo gjë të fishkur

O të gjitha dyert e pranimit, hapuni

Sepse mjetet e qëllimit drejt jush janë nisur

O retë e bujarisë hyjnore, lëshoni shiun

Sepse pëllëmbët e thatësirës drejt jush janë shtrirë

Për hir të udhërrëfyesit tonë e ngjallësit të zemrave

Dhe udhëzuesit tonë në shtegun e rrugës së drejtë

Na ftoi në të Vërtetën me të vërtetën e shpallur

Mbi të nga i Gjithëmëshirshmi, me thirrjen më të mirë

U përgjigjëm e pranuam, të bindur ndaj urdhrit të tij

Dëgjuam e u bindëm me udhëzim e largpamësi

O Zot, na përforco në të Vërtetën dhe udhëzimin

O Zot, na i merr shpirtrat në fenë më të mirë

Përfshiji me mëshirë të parët dhe pasardhësit

Familjen, shokët dhe të gjithë farefisin

Dhe gjithë njerëzit e fesë nga çdo musliman

Që dëshmoi për Ty Njëshmërinë pa asnjë dyshim

Dërgo salavate e selam përherë e në amshim

Mbi më të mirin e dërguar tek umeti më i mirë

Muhamedin, të cilin e veçove me mirësinë Tënde

Të madhe, me shpalljen e Librit dhe me urtësinë