Më dhuruan bashkim pas largësisë sime

dhe e nderuan besëlidhjen time të moçme

Dhe përkundër smirëziut

e përmbushën me bashkim premtimin tim

O, gëzimi im në këtë afërsi!

O, lumturia e fatit dhe mbarësisë sime!

Hëna ime e plotë u tregua bujare me bashkim

O lumturia ime, e arrita qëllimin tim

Prandaj mblidhuni, o lotët e syve të mi

Dhe shuhu, o zjarr i mallit tim

Se unë jam në natën time të afërsisë

Dhe burimi i dritës sime shpirtërore u kthjellua

I mora gotat e mia të dashurisë

Mes aromës së borzilokut dhe trëndafilave

Prej duarve të atij me ecje të hirshme

Magjepsës, me shtat të hollë e elegant

Herë këndon: "Merre gotën time"

E herë tjetër: "Ja ku e ke faqen time"

Nëse i them: "O njëmijë herë zotëri"

Më përgjigjet: "O njëmijë herë shërbëtori im"

Nëse të tjerëve u jep pije të holluar

Mua më veçon vetëm me të pastrën e të kulluarën

Në dashurinë e tij, lëre qortimin ndaj meje

Dhe flake tej ndjesinë time për "gabim" apo "drejtësi"

Sepse zjarri i mallit tim në dashurinë e tij

Është si kënaqësia e amshuar e Xhenetit për mua