Тэд холдсоны минь дараа надтай учрав

урьдын гэрээ тангаргийг минь сахин биелүүлэв.

Атаархагсдыг үл харгалзан

амласан ёсоороо надтай учирч ерөөв.

Ойртон учрахын баясгалан минь ээ

олдсон хувь тавилан, аз жаргал минь ээ!

Тэргэл саран минь надтай учран соёрхов

тэгш дүүрэн баясал минь, би зорилгодоо хүрлээ.

Мэлмийн нулимс минь баярлан урсагтун

хүсэл тэмүүллийн минь гал одоо унтрагтун.

Дотно нөхөрлөлийн энэ л шөнөдөө би

амьдралын минь ундарга ариун тунгалаг боллоо.

Хундагатай дарсаа би гартаа барилаа

анхилуун райхан, сарнайн үнэр дунд.

Уян наалинхай хөдөлгөөнтэй нэгний гараас

уяхан гоолиг биетэй, сэтгэл булаам тэр л нэгэн.

"Хундагаа ав" хэмээн нэгэнтээ дуулж

"хацар минь энэ байна" гэж дараа нь өгнө.

"Мянгантаа хүндэт Эзэн минь" гэж намайг хэлбэл

"Мянгантаа хайртай зарц минь" гэж тэр хариулна.

Өрөөл бусдад хольцтой дарс өгөх боловч

өөрт минь ганцхан ариун цэврийг нь зориулна.

Түүнийг хайрлахыг минь бүү буруутга

төөрөгдөл, зөв бурууг минь цөмийг нь орхи.

Түүний хайрт шатах миний хүсэл

мөнхийн диваажингийн жаргал мэт ээ.