ឱ! ក្លិនសុគន្ធនៃព្រះជាម្ចាស់ ឱ! សេចក្ដីមេត្តារបស់ទ្រង់

ឱ! កម្លាំងស្រូបទាញនៃសច្ចធម៌ សូមប្រទានការសួរសុខទុក្ខមកចុះ

ឱ! ខ្សែភ្នែកនៃព្រះជាម្ចាស់ ឱ! ការសម្លឹងមើលរបស់ទ្រង់

ឱ! ខ្យល់រំភើយនៃភាពទន់ភ្លន់ សូមបក់មកក្បែរយើងខ្ញុំចុះ

ឱ! ជំនួយនៃព្រះមហាករុណាទិគុណ សូមប្រទានមកយ៉ាងឆាប់រហ័ស

ដល់យើងខ្ញុំ ហើយសូមស្រាយចំណងនៃរាល់ទុក្ខលំបាកផង

ឱ! សេចក្ដីមេត្តានៃព្រះអម្ចាស់ដ៏មហាអាណិតអាសូរ សូមបែរមករកយើងខ្ញុំ

ហើយសូមប្រោសឱ្យរស់ឡើងវិញនូវរាល់អ្វីដែលទ្រុឌទ្រោមដោយវិញ្ញាណនៃព្រះគុណ

ឱ! ទ្វារនៃរាល់ការយល់ព្រមទាំងឡាយអើយ ចូរពន្លាឱ្យចំហចុះ

ព្រោះយានជំនិះនៃបំណងប្រាថ្នាបានតម្រង់មករកអ្នកហើយ

ឱ! ដុំពពកនៃសទ្ធាដ៏ទេវៈអើយ សូមបង្អុរភ្លៀងមកចុះ

ព្រោះបាតដៃនៃភាពរាំងស្ងួតបានលាត្រដាងឆ្ពោះទៅរកអ្នកហើយ

ដោយសារភាពខ្ពង់ខ្ពស់នៃមគ្គុទ្ទេសក៍ និងអ្នកប្រោសបេះដូងយើងខ្ញុំឱ្យរស់

និងជាអ្នកនាំផ្លូវយើងខ្ញុំទៅកាន់វិថីដ៏ត្រឹមត្រូវបំផុត

លោកបានអញ្ជើញយើងខ្ញុំមករកសច្ចធម៌ តាមរយៈសច្ចធម៌ដែលបានបញ្ចុះមក

ដល់រូបលោកពីព្រះមហាករុណាទិគុណ ជាការអញ្ជើញដ៏ប្រសើរបំផុត

យើងខ្ញុំឆ្លើយតប យើងខ្ញុំយល់ព្រម ដោយចុះចូលចំពោះបទបញ្ជារបស់លោក

យើងខ្ញុំបានឮ យើងខ្ញុំបានប្រតិបត្តិតាម ដោយការណែនាំ និងបញ្ញាញាណ

ឱ! ព្រះអម្ចាស់អើយ សូមឱ្យយើងខ្ញុំរឹងមាំលើសច្ចធម៌ និងការណែនាំ

ហើយឱ! ព្រះអម្ចាស់អើយ សូមទទួលយកជីវិតយើងខ្ញុំក្នុងជំនឿដ៏ប្រសើរបំផុត

ហើយសូមសេចក្ដីមេត្តាគ្របដណ្ដប់លើបុព្វបុរស និងកូនចៅ

ព្រមទាំងក្រុមគ្រួសារ មិត្តភក្តិ និងញាតិសន្ដានទាំងអស់

និងអ្នកកាន់សាសនាទាំងអស់ ក្នុងចំណោមមូស្លីមគ្រប់រូប

ដែលបានប្រតិបត្តិឯកទេវនិយមថ្វាយទ្រង់ ដោយគ្មានមន្ទិលសង្ស័យ

ហើយសូមប្រទានពរជ័យ និងសន្តិភាពជារៀងរហូតតទៅ

ដល់បុគ្គលដ៏ប្រសើរបំផុតដែលត្រូវបានបញ្ជូនមកកាន់ប្រជាជាតិដ៏ឆ្នើមបំផុត

គឺលោក មូហាំម៉ាត់ ដែលទ្រង់បានជ្រើសរើសដោយព្រះគុណដ៏ខ្ពង់ខ្ពស់

ដ៏អស្ចារ្យរបស់ទ្រង់ និងការបញ្ចុះមកនូវគម្ពីរ ព្រមទាំងប្រាជ្ញាញាណ