ក្រៅពីសម្រស់របស់លោកអ្នក ការសម្លឹងរបស់ខ្ញុំគឺជាបម្រាម

ហើយក្រៅពីសម្ដីរបស់លោកអ្នក សម្រាប់ខ្ញុំគឺជាសម្ដីឥតន័យ

អាយុកាលរបស់សត្វឥន្ទ្រីជាមួយលោកអ្នក គឺត្រឹមតែមួយភាគនៃថ្ងៃ

ហើយមួយម៉ោងជាមួយអ្នកដទៃ គឺប្រៀបបាននឹងឆ្នាំហើយឆ្នាំទៀត

ការអត់ធ្មត់របស់ខ្ញុំឆ្ងាយពីលោកអ្នក គឺជាអ្វីដែលមិនអាចទៅរួច

ហើយគ្មានអ្វីសម្លាប់ខ្ញុំឡើយ ក្រៅពីការផ្តាច់ទំនាក់ទំនងពីលោកអ្នក

កាលបើខ្ញុំបានឃើញលោកអ្នក រាល់កង្វល់របស់ខ្ញុំក៏រលាយបាត់

តែបើលោកអ្នកអវត្តមាន សេចក្តីស្លាប់ក៏ខិតជិតមកដល់ខ្ញុំ

ខ្ញុំប្រាថ្នាចង់ក្លាយជាអ្នកកំដររបស់លោកអ្នក

ហើយចង់ឱ្យតង់របស់ខ្ញុំត្រូវបានបោះនៅក្នុងទីធ្លារបស់លោកអ្នក

ចូរព្យាបាលអ្នកដែលឈឺដោយសារការបោះបង់ ដោយការជួបជុំគ្នា

អ្នកដែលវង្វេងក្នុងក្តីស្រឡាញ់ចំពោះលោកអ្នក នៅពេលសត្វព្រាបយំ

រឿងរ៉ាវនៃក្តីស្នេហាចំពោះលោកអ្នក គឺជាអ្វីដែលមានតាំងពីយូរលង់

ហើយគ្រឿងស្លៀកពាក់ដែលគេគ្រងពីក្តីស្រឡាញ់ គឺភាពទន់ខ្សោយ

ដ្បិតលោកអ្នកគឺជាប្រភពដ៏ឧត្តុង្គឧត្តមបំផុតក្នុងចំណោមប្រភពទាំងឡាយ

បើលោកអ្នកសព្វព្រះទ័យ បំណងប្រាថ្នារបស់ខ្ញុំនឹងសម្រេច

ដោយសារតែលោកអ្នក រឿងដែលលំបាកក៏ត្រឡប់ជាស្រួល

ដូច្នេះសូមផ្តល់សេចក្តីសប្បុរសដោយក្តីមេត្តា ឱ! អស់លោកអ្នកដ៏ថ្លៃថ្នូរ

គ្មាននរណាក្រៅពីលោកអ្នកឡើយ ដែលស័ក្តិសមនឹងភាពសប្បុរស

តើភ្ញៀវដែលមកស្នាក់អាស្រ័យក្នុងទីធ្លារបស់លោកអ្នក អាចនឹងរងការឈឺចាប់បានយ៉ាងដូចម្តេច?