სამყაროს მშვენიერებისგანაა ჩემი ღვინო,

ვიგემე იგი წმინდა და ნებადართული

იგი ჩემი სავსე მთვარის თვისებებიდანაა,

რომელმაც მოიცვა მთელი ეს მშვენება

სახე, რომლის ნათებაც გაბრწყინდა,

და სამყარო მის სარკედ იქცა

თუ შენი გული მასთან შეხვედრას ესწრაფვის,

მაშინ შენი სურვილი მის სურვილს შეურწყი

სულით მე ვრცელი ზეცა ვარ,

სხეულით კი — მტვერი

მე ვარ ყვავილი, მე ვარ წყალი,

ჩემი ექსტაზის სიტკბოებაში დავიკარგე

სული ამაღლდა თავის მაღალ საფეხურზე,

გული კი მის მცველად იქცა

სხეულიც თავისი გზით გაეშურა,

რათა ამით მიეღწია თავისი წადიერისთვის

ო, მკიცხავო, ვინც უმეცრების გამო სდევნი

შეყვარებულს, რომელმაც კავშირს მიაღწია

თუ გულწრფელად მკიცხავ, შენც გამოიცდები,

და ამ სიყვარულს იმავწამს იგემებ

მის გარდა ყოველივესგან შენი განდგომით,

მის მარადიულობაში ჰპოვებ თავშესაფარს

მისი კმაყოფილების სასმლის სიგრილით,

გულის მწველი წყურვილი დაცხრება

დაე, ღვთის კურთხევა მიენიჭოს მას,

ნებისმიერ სურნელზე უფრო ნაზი

შუამავალს, რომელიც მოევლინა ქვეყანას,

ვისი ნათელიც ყოველგვარ ცდომილებას წარხოცავს

დაუსრულებელი მშვიდობით,

მის ოჯახს, მაღალი ღირსების ხალხს

მის თანამებრძოლებსა და მათ მიმყოლთ,

და ღვთის ყველა მსახურს