Saking éndahing jagad asaling khamarku

Dakicipi murni sarta sanyatané halal

Iku saking sipat-sipaté rembulanku

Kang ngrangkum sakèhing kaéndahan sampurna

Wedana kang wus sumorot cahyané

Lan jagad raya dadi pangiloning dhiri

Yèn atimu kepéngin nggayuh patemon

Mula dadèkna pepénginanmu manut kersané

Kelawan ruh, aku iki langit kang jembar

Kelawan raga, aku mung awu kang sumebar

Aku iki kembang, aku iki banyu

Aku keli ing sajroning manisé kasmaran

Ruh wus munggah marang drajat luhuré

Lan ati dadi kang njaga sarta ngrumat

Lan raga tumindak ing margané

Supaya nggayuh gegayuhan kang sanyata

Dhuh wong kang nyacad marga kabodhon

Marang wong kasmaran kang wus nggayuh manunggal

Yèn sira nyacad kanthi tulus bakal tiniba pacoban

Lan sira bakal ngrasakaké tresna iki ing wektu iku uga

Kanthi sirnané sira saka saliyané Panjenengané

Sira suméndhé ing jembaring kalanggengané

Lan kanthi segeré unjukan ridhané

Sirna panasing rasa kangen ing jero ati

Sholawaté Gusti Allah muga katuraké

Luwih arum tinimbang sakèhing ganda wangi

Marang Rasul kang wus ngatonaké dhiri

Cahyané nyirnakaké kabèh sasar-susur

Kanthi salam kang ora ana pedhoté

Lan kagem kulawargané, para jalma luhur drajaté

Sarta para sahabat lan sapa waé kang manut

Lan sakèhing para kekasihé Gusti Allah