Kula gadhah para kekasih wonten Madinah, menawi piyambake sedaya mirsani

dhateng kula, sedaya sisah sirna lan sedaya bebaya ilang

Lan manah dados tentrem sarta kebak kabungahan

ingkang ageng, sarta pitulungan lan kamenangan tansah nunggil ing kula

Dhuh tiyang-tiyang ing Thoybah, mrikiya, sayektosipun kula nembe nandang branta

lan saestunipun kula nengga punapa ingkang kula idham-idhamaken

Sampun dados pakulinan panjenengan bilih tiyang ingkang nresnani menawi

nyebat panjenengan kanthi lathi katresnan badhe kaparingan panglipur

Katresnan ngebaki manah kula, malah sampun mujud

ing dhiri kula piyambak, menawi rupa saged paring pratandha

Dhuh Gustining para Rasul, tulungana kula amargi mboten wonten

daya upaya malih kejaba katresnan dumateng panjenengan ingkang kula simpen

Konjuk ing Gusti miyos panjenengan ingkang mulya, ingkang

ndadosaken bumi rahayu lan sedaya pancabaya sirna

Dinten nalika dunya dados padhang, mboten nate wonten

srengenge utawi rembulan ingkang mlethek kados dinten menika

Salam taklim kagem panjenengan saking manah ingkang arum

gandane tambah wangi amargi ruh panjenengan ingkang suci

Lan wonten tiyang ingkang pitaken: "Apa kang sira kangeni?", kula paring wangsulan

"Kula kangen Thoybah kanthi kangen ingkang mboten wonten watesipun"

Dhuh pangarsa jumantara, mudhunna kula nalika sampun katingal

ing netra panjenengan kubah ijo lan kamar-kamar suci

Wonten mriku kula badhe tumuju cendhela Rasul supados

nyuwun ngapura dumateng Allah ing pangghenan dingapuraning dosa

Sholawatipun Allah mugi tetep katur dumateng panjenengan selaminipun

ayat-ayat lan surat dipun waos wonten pengetan miyos panjenengan

Lan dumateng kulawarga, sahabat, sarta sedaya pandherekipun

ugi para Ghaus, Quthub, lan para kekasih nalika sami rawuh