Sou plenn Al-Aqiq nou te reyini

nou menm ak bèl je nwa yo

Sa ou panse de foli Majnoun pou Layla?

Li te sèlman konnen yon ti pati nan foli sa a

O je mwen yo, ala fatige yo fatige m

e o po je m yo, ala lage yo lage m

O ti kè mwen, pran pasyans

pou moun sa yo ki pati kite m yo

Mwen te kite yo depi jou lendi

nan madi maten, mwen te santi m sèl san yo

Se mèt vanyan yo ye ki kite m dèyè

m ap kriye san nan je m

Mwen kriye jouk zwazo yo

ki sou branch bwa yo te pran pite pou mwen

Devan Bondye, si m mouri tèlman m anvi wè yo

lave kò m ak pwòp dlo nan je m

Rele anmwe pou mwen epi di

"Men yon moun bèl je sa yo touye"

Mwen te toujou rete bò kote montir yo

m ap di, "Tanpri souple, pote m ale ak nou"

Nan direksyon kote fanmi m yo rete

yo pati san yo pa di m orevwa

Ale, o mesaje mwen, bò kote yo

prese, epi bo men yo pou mwen

Pote tout salitasyon mwen yo ba yo

petèt konsa y a aksepte m ankò

Mesaje m nan tounen vin jwenn mwen ak yon souri

li di m, "Rejouyi ou, lapè a fèt!"

Pou sakre pen ak sèl nou te pataje a

yo pwomèt mwen n ap reyini ankò