Ey Allohning nafahalari, ey Uning lutf-u marhamatlari

Ey Haqning jazbalari, bir ziyorat ila saxovat ko‘rsatgil

Ey Allohning nazarlari, ey Uning lutfli boqishlari

Ey lutf shabadalari, bir epkin ila bizga tomon yuzlan

Ey Rahmonning yordami, bizga tezlik ila saxiylik qil

Kel-u, barcha mushkulotlar va balolar tugunini yechib yuborgil

Ey rahmdil Rabbning rahmati, bizga qarab yuzlan

Va fazl ruhi ila barcha chirigan vujudlarni tiriltirgil

Ey qabulning barcha eshiklari, lang ochilingiz

Zero, maqsad ulovlari sizga qarab yo‘lga chiqdi

Ey ilohiy saxovat bulutlari, ustimizga yog‘ingiz

Chunki qurg‘oqchilik qo‘llari Sizga qarab cho‘zildi

Yo‘lboshchimiz va qalblarimizni tiriltiruvchi hurmati

To‘g‘ri va mustahkam yo‘lga bizni boshlovchi zot hurmati

U bizni Haqqa, Rahmon tomonidan nozil qilingan haq bilan

Eng afzal va go‘zal da’vat ila chorladi

Biz uning amriga bo‘ysunib javob berdik va qabul etdik

Hidoyat va basirat ila eshitdik hamda itoat qildik

Yo Rabb, bizni Haq va hidoyat yo‘lida sobitqadam qil

Va yo Rabb, jonimizni eng xayrli millat uzra olgin

Ota-onalarimizni va zurriyotlarimizni rahmat ila chulg‘a

Hamda ahlimizni, do‘stlarimizni va barcha yaqinlarimizni

Va din ahli bo‘lgan barcha musulmonlarni ham

Sening uchun shak-shubhasiz tavhidni barpo etganlarni

Zamonlar osha mangu va abadiy salovot-u salom bo‘lsin

Eng xayrli ummatga yuborilgan eng xayrli zotga

Sening buyuk fazling, Kitob nozil bo‘lishi va hikmat ila

Maxsus tanlab olingan zot — Muhammad (s.a.v.)ga