Узоқликдан сўнг менга висолни раво кўрдилар

ва ўтмишдаги аҳдимга вафо қилдилар

Ҳасадгўйларга қарамай

висол ила ваъдамни амалга оширдилар

Эй, яқинликдан топган сурурим!

Эй, насибам ва бахтимнинг саодати!

Тўлин ойим менга висолни инъом этди

эй шодлигим, мақсадимга эришдим

Эй кўз ёшим, энди (шодликдан) жам бўл

ва эй ишқим оташи, сўнгин энди

Мен унс ва улфат оқшомидаман

маънавий манбаим сувлари тинди

Райҳон ва гуллар ифори орасида

ишқ қадаҳларимни қўлга олдим

Нозик ҳаракатли, мафтункор

ва хипча қоматли зотнинг қўлларидан

Гоҳида "Қадаҳимни ол" деб куйлайди

гоҳида эса "Мана юзим" дейди

Агар "Эй минг бора хожам" десам

у менга "Эй минг бора қулим" дейди

Агар бошқаларга аралашма ичимлик берса

мени холис ва соф шароб ила сийлайди

Унинг ишқида мени маломат қилишни қўй

гумроҳлигим ва ҳидоятимни бир четга улоқтир

Унинг ишқидаги ўтли шавқим

мен учун мангу жаннат неъмати кабидир