தூய்மையானதை ஏற்றுக்கொள், கலங்கலானதை விட்டுவிடு

விவகாரங்கள் அனைத்தையும் விதியின் பால் ஒப்படைத்துவிடு

நீ எப்போது சோதிக்கப்பட்டாலும் அவர் ஏவியபடி நடப்பாயாக

படைப்புகளின் வழிகாட்டியும் மனிதர்களில் சிறந்தவருமான அவர்

நிச்சயமாக அனைத்துக் காரியங்களும் தீர்மானிக்கப்பட்டுவிட்டன

ஒளிமிக்க லவ்ஹில் (பலகையில்) எழுதுகோலால் எழுதப்பட்டுவிட்டன

ஆதியிலிருந்த அந்தப் பழமையான அறிவிலே

உருவங்கள் யாவும் படைக்கப்படுவதற்கு முன்னமே

உனது கவலைகளைத் தூர எறிந்திடு, ஏனெனில் அவை

என் தோழனே, வெறும் தீங்கினைத் தவிர வேறில்லை

உனது காலத்தைச் சரியாகப் பயன்படுத்து, நிம்மதி கொள்

"இருந்தால்", "ஏன்" என்பவற்றிலிருந்து விடுபடு, நீ வெற்றியடைவாய்

அல்லாஹ்விடமே எப்போதும் மீண்டு செல்

ஏதேனும் ஒரு கஷ்டமோ நெருக்கடியோ உன்னை அழுத்தும்போது

நீ ஒரு சோதனையால் பீடிக்கப்பட்டால்

பொறுமையாளர்களுடன் சேர்ந்து அதனைப் பொறுமையுடன் எதிர்கொள்

உறுதிமிக்க ஒவ்வொரு நேர்மையான ஆத்மாவாகவும் இரு

மாற்றங்களின் போது கண்ணியத்துடன் நிலைத்திருப்பாரே அவரைப் போல

உனக்கு ஏதேனும் ஒரு அருட்கொடை கிடைத்தால்

நன்றி செலுத்துபவர்களோடு சேர்ந்து நீயும் நன்றி செலுத்துவாயாக

அகிலங்களின் இறைவனான அல்லாஹ்வுக்கு நன்றி சொல்

அவன் குறிப்பிட்டது போலவே உனக்கு மேன்மேலும் வழங்கப்படும்

உனது ஆத்மாவிற்காக நீயே நற்செயல்களைச் செய்துகொள்

அதன் மூலம் நீ சகல தீமைகளிலிருந்தும் தப்பிப்பாய்

நீ பெரும் நன்மையைக் கொண்டு வெற்றியடைவாய் மற்றும்

நிலையான தங்குமிடமாகிய சொர்க்கங்களைக் கொண்டும்

அதுவே நித்திய இல்லம், இன்பங்களின் இல்லம்

கண்ணியத்தின் இல்லம் மற்றும் இறைக்காட்சியின் இல்லம்

மறுமைப் பயணத்திற்காக உனது கட்டுச்சாதத்தைத் தயார் செய்

எதிர்பாராத மரணம் உன்னைத் திடுக்கிடச் செய்யும் முன்னே

ஏனெனில் மரணம் மிக விரைவில் வரக்கூடியது

ஒருவேளை உனது தவணைக்காலம் ஏற்கனவே வந்துவிட்டதோ

யா அல்லாஹ், நீயே தேடப்படுபவன்

நீயே ஆதரவு வைக்கப்படுபவன் மற்றும் எங்களின் கருவூலம்

எங்கள் இறைவா, எங்கள் குறைகளை மறைத்து மன்னிப்பாயாக

மறைப்பவர்களில் நீயே மிகவும் கண்ணியமானவன்

எங்கள் இறைவா, எங்களை இரக்கத்தோடு நோக்குவாயாக

நோக்குபவர்களில் நீயே மிகச் சிறந்தவன்

எங்கள் இறைவா, எங்களுக்கு நன்மையான முடிவைத் தந்தருள்

எங்களின் இறுதிப் பயணம் நெருங்கும் வேளையில்

பின்னர் அந்தத் தூதரின் மீது ஸலவாத்து உண்டாகட்டும்

முளர் கோத்திரத்தில் வந்த படைப்புகளிலேயே சிறந்தவர் அவர்

கண்ணியமிக்க நபிமார்களின் முத்திரை அவர்

பிரகாசிக்கும் விளக்குகளிலேயே மிக மேலானவர்

அவரது குடும்பத்தினர் மற்றும் தோழர்கள் மீதும்

அவர்களைப் பின்பற்றிச் செல்லும் வழித்தோன்றல்கள் மீதும்

அதிகாலை வேளையில் நறுமணத்தோடு

தென்றல் காற்று வீசிக் கொண்டிருக்கும் காலமெல்லாம்

அல்லது புண்ணிய பூமியின் புறாக்கள்

மரக்கிளைகளின் மேல் அமர்ந்து கூவிக் கொண்டிருக்கும் காலமெல்லாம்