மதீனாவில் எனக்குப் பிரியமானவர்கள் உள்ளனர், அவர்கள் என்னைப் பார்த்தால்

என் கவலைகள் அகலும், துன்பங்கள் நீங்கும்.

இதயம் அமைதியிலும் மட்டற்ற மகிழ்ச்சியிலும் திளைக்கும்

வெற்றியும் நற்பேறும் என்னைத் துணை தொடரும்.

தய்யிபாவின் மக்களே, விரைந்து வாருங்கள், நான் காதலால் வாடுகிறேன்

நான் எதை ஆசைப்பட்டேனோ அதற்காகக் காத்திருக்கிறேன்.

உங்கள் வழக்கம் இதுவே, ஒரு காதலன் உங்களை

அன்பின் மொழியால் அழைத்தால் அவன் நலம் பெறுகிறான்.

காதல் என் நெஞ்சை நிரப்பியுள்ளது, மாறாக அது என் உருவிலேயே

ஒரு மனித வடிவாக உருவெடுத்துள்ளது, தோற்றங்கள் எதையேனும் காட்டினால்.

தூதர்களின் தலைவரே, எனக்கு உதவி புரியுங்கள், உம்மிடம் நான் சேமித்து வைத்த

உமது காதலைத் தவிர வேறு உபாயம் ஏதும் என்னிடம் இல்லை.

உமது மகத்தான பிறப்பு இறைவனுக்கே புகழானது, அதனால் பூமி மகிழ்ச்சியுற்றது

காலத்தின் மாற்றங்கள் அதனால் விலகின.

அந்த நாளில் உலகம் ஒளிபெற்றது, அதைப் போன்றதொரு நாளில்

சூரியனோ சந்திரனோ இதுவரை உதயமானதில்லை.

நறுமணம் கமழும் இதயத்திலிருந்து உமக்கு ஸலாம், அதன் நறுமணத்தை

உமது வாசமிக்க ஆன்மா மென்மேலும் அதிகரிக்கச் செய்கிறது.

"நீ எதை ஏங்குகிறாய்?" என்று என்னிடம் கேட்டவரிடம் நான் சொன்னேன்

"அளவில்லாத ஏக்கத்தோடு நான் தய்யிபாவை ஏங்குகிறேன்."

வான்வழி நடத்துபவரே, உமது கண்களுக்குப் பச்சைக் குப்பாவும்

அறைகளும் தென்படும்போது என்னை அங்கு இறக்கி விடுங்கள்.

அங்கே நான் இறைத்தூதரின் ஜன்னலை நோக்கிச் செல்வேன்

பாவங்கள் மன்னிக்கப்படும் அவ்விடத்தில் அல்லாஹ்விடம் மன்னிப்புக் கோருவேன்.

உமது மிலாது அமர்வுகளில் திருவசனங்களும் அத்தியாயங்களும்

ஓதப்படும் வரையிலும் அல்லாஹ்வின் ஸலவாத்து உம் மீது உண்டாவதாக.

உமது குடும்பத்தார், தோழர்கள் மற்றும் பின்பற்றுவோர் அனைவர் மீதும்

கௌது, குத்பு மற்றும் வருகை தந்திருக்கும் அன்பர்கள் மீதும் உண்டாவதாக.