அழகிய மேனி நம்மை என்றும் வளர்க்கும்

நம்மை அவர் எப்போதும் நன்கு அறிவார்

நீதியையும் நன்மையையும் நமக்கு வழங்க

அந்தத் திருமேனி நம்மிடம் எழுந்தருளியது

மேன்மையான ஆற்றலால் சிறப்படைந்தது

மங்கலகரமானது என்று அது அறியப்பட்டது

பேரழகினால் அது வர்ணிக்கப்பட்டது

இரகசியமாகவும் பகிரங்கமாகவும் அது புகழப்பட்டது

பிரகாசத்தில் முழுமை பெற்றுத் திகழ்கிறது

படைப்பும் பண்பும் ஒன்றையொன்று பிரதிபலிக்கின்றன

அனைத்தும் சீராக அமைந்துள்ளன

அதிலிருந்து பேரொளி வெளிப்பட்டுத் தோன்றுகிறது

அதன் சுனைகள் தெளிந்து இனிமை தருகின்றன

அதன் நோக்கங்கள் அனைத்தும் அடையப்பட்டன

அதன் நற்பண்புகள் மேன்மையடைந்து

பெருமைக்குச் சிகரமாக உயர்ந்து நின்றன

அதன் அருஞ்செயல்கள் எங்கும் பரவின

அதன் நற்செய்திகள் நாலாபுறமும் சென்றன

அதன் உள்நோக்கங்கள் ஆன்மாக்களை

உறுதியான நம்பிக்கைக்கு வழிநடத்துகின்றன

அவரது வர்ணனையில் பல படிப்பினைகள் உள்ளன

எந்த ஒரு மனிதனும் அவற்றை விவரித்ததில்லை

அனைவரும் வியப்பில் ஆழ்ந்து கிடக்கின்றனர்

இடைவிடாத நேசத்தில் அவர்கள் உருகுகின்றனர்

அவரது தோற்றம் நடுத்தர உயரமானது

அவரது இயல்பான தன்மையை நீர் காண்பது போல

தனது தோற்றத்தினால் அவர் மிஞ்சுகின்றார்

மிக நீண்ட கால்களைக் கொண்டவர்களையும் கூட

அவரது திருமுகத்தில் சந்திரன் நிலவுகிறது

அவரது புன்முறுவலில் முத்துக்கள் மின்னுகின்றன

அவரது பேச்சில் மிகுந்த அடக்கம் உண்டு

மௌனத்தினால் அவர் தம்மை அலங்கரித்துக் கொண்டார்

அகன்ற நெற்றிப் பரப்பைக் கொண்டவர்

இறைவனுக்காகத் தாழ்த்திப் பணிகின்ற நெற்றியது

புத்தியுடன் அது உயர்ந்து நின்றது

கண்ணியத்திலும் இறைஞானத்திலும் சிறந்து நின்றது

அவரது முகத்தில் ஒரு ஒளிப் பொலிவு உண்டு

அவரது கண்களில் ஒரு ஆழ்ந்த கருமை உண்டு

அவரது புருவங்கள் வளைந்து நீண்டவை

அழகினால் அவை மிளிரச் செய்யப்பட்டுள்ளன

அவர் காணப்பட்டால் ஒரு ஒளி அவரைத் தொடரும்

அந்த ஒளி எப்போதும் அவருடன் இணைந்து வரும்

மென்மையான நாசியைக் கொண்டவர்

அது உயர்ந்தும் வளைந்தும் அழகாக அமைந்திருந்தது

அவரது வாய் அகலமானதாக இருந்தது

அவரது மார்பு விரிந்தும் விசாலமாகவும் இருந்தது

அவரது வயிறு சீராக அமைந்திருந்தது

மார்போடு சமமாக ஒடுங்கிய நிலையில் இருந்தது

திருமுகம் முத்துப்போலப் பிரகாசிக்கிறது

மேனியின் நிறம் ரோஜா மலரைப் போன்றது

அவரது ஆன்மா ஒளியின் வடிவானது

அண்ட சராசரங்களையும் அது ஒளிர்வித்தது

வலிமையான உடல் மூட்டுகளைக் கொண்டவர்

தூய்மையான உணர்வுகளைப் பெற்றவர்

விதிகளில் அவர் நிகரற்ற ஒரு தனித்துவம்

அவரைப் போன்ற ஒரு மனிதர் இருந்ததில்லை

மை தீட்டியது போன்ற இமைகளைக் கொண்டவர்

பிரகாசமும் குளிர்ச்சியும் பொருந்திய பற்களை உடையவர்

மாதுளை விதைகளைப் போன்ற அந்தப் பற்கள்

இதுபோன்றதொரு மாதுளையை நீர் கண்டதுண்டோ?

அடர்த்தியான தாடியைக் கொண்டவர்

அது மிகச் சீராகப் பரவி அமைந்திருந்தது

அடர்த்தியான தலைமுடியைக் கொண்டவர்

அது அவரது காதுகளைத் தாண்டிச் செல்லவில்லை

இருளில் மிளிரும் பௌர்ணமி அவரது திருவாய்

அவர் புன்னகை பூக்கும் போது அது தெரியும்

தரை மார்க்கத்திலும் கடல் மார்க்கத்திலும்

அவரது நறுமணம் எங்கும் பரவியிருந்தது

உறவுகளை அவர் எப்போதும் பேணி இணைப்பார்

எளியோரின் சுமையைத் தாங்குபவராக இருப்பார்

நன்மைகளைச் செய்பவராக அவர் திகழ்ந்தார்

மறைவாகவும் வெளிப்படையாகவும் அதனைச் செய்தார்

படைப்பினங்களிடையே அவருக்கு ஒரு கம்பீரம் உண்டு

சத்தியத்தில் அவர் லயித்துப் போயிருப்பார்

அவரது நற்குணங்கள் மிஞ்சி நிற்கும்

ஜின்களையும் மனிதர்களையும் விட அது மேலானது

அவரது மயிர் ரேகையும் மேனியும்

அவரது நெற்றியின் பொலிவினால் அழகடைந்தன

அவரது பார்வையைப் போல ஒன்றுமே இல்லை

கண்ணியத்திலும் இறைநம்பிக்கையிலும் அது சிறந்தது

மெல்லிய மயிர் ரேகையைக் கொண்டவர்

அந்தஸ்தில் யாவரையும் விட மேலோங்கி நின்றார்

நற்பண்புகளால் அவர் கண்ணியம் பெற்றார்

மக்கள் அனைவருக்கும் அவர் தலைவராகத் திகழ்ந்தார்

அவரது குதிகால் பகுதியில் தசை குறைவாக இருந்தது

அவரது மார்புப் பகுதியோ மிகவும் விரிந்து இருந்தது

தீர்க்கமான பேச்சாற்றல் அவருக்கு வழங்கப்பட்டது

புகழ்பெற்ற சஹ்பானையும் அவர் மிஞ்சி நின்றார்

வீசும் கஸ்தூரியின் நறுமணத்தைப் போன்றவர்

மேட்டிலிருந்து இறங்கி வருவதைப் போன்ற நடையுடையவர்

களைப்படைந்த மனிதனை அவர் மறக்கச் செய்வார்

அவனது குடும்பத்தையும் அவனது ஊர்களையும் கூட

அவரை நேசிப்பது இறைநம்பிக்கையின் அடையாளம்

அவரை வெறுப்பதோ இறைமறுப்பின் அறிகுறி

அவரை இழிவுபடுத்தியவனுக்கு அழிவுதான்

ஒரு உன்னத மனிதனைப் புகழ்வதில் குறை கண்டவனுக்கு

இறைவனே! எங்களை மகிழ்ச்சியில் ஆழ்த்துவாயாக

அவரது ஒளியைக் கொண்டு எம்மை மீட்டெடுப்பாயாக

நாங்கள் அந்தப் பேரழகைக் காணும் வரை

இவ்வுலக வாழ்விலும் எமது மறுமையிலும்

படைப்பினங்களுக்கு அருட்கொடைகளை வாரி வழங்கியவன்

ஸலவாத்தும் ஸலாமும் சமர்ப்பிப்பானாக

காலமெல்லாம் அந்த நபியின் மீது அருள் பொழியட்டும்

உயர்வான அந்தஸ்தைக் கொண்ட இரட்சகன் அவன்

அவ்வாறே பாத்திமா ஸஹ்ராவின் மீதும்

அவரது கண்ணியமிக்க தாயார் மீதும் பொழியட்டும்

அவரது குடும்பத்தார் அனைவர் மீதும் பொழியட்டும்

பௌர்ணமி நிலவு நம்மோடு கொஞ்சும் காலம் வரை