Kaula gaduh kakasih di Madinah, upami maranehna neuteup

ka sim kuring, sirna kabingung sarta leungit sagala kasusah.

Tur janten ieu hate dina katingtriman sarta kabingah

anu pohara, sarta dibarengan ku taufiq sarta kameunangan.

Duh para ahli Madinah, hayu! Saenyana sim kuring nuju gering asih

sarta saenyana sim kuring teh nuju nganti naon anu diharepkeun.

Parantos janten kabiasaan aranjeun yen jalma anu mikacinta upami

nyambat ka aranjeun ku basa kanyaah, tangtu bakal lipur hatena.

Ari cinta teh minuhan jero hate, malah parantos ngajirim dina

dedegan sim kuring, upami rupa teh janten cicirenna.

Duh Gusti dunungan para Rasul, tulungan sim kuring margi tos teu aya

daya upaya deui lian ti rasa cinta ka anjeun anu disimpen.

Kagungan Allah wedalan anjeun anu mulya, anu ku ayana

jagat janten bagja sarta sagala pancabahaya teh sirna.

Poe anu matak nyaangan dunya, nu tacan kungsi aya

panonpoe atanapi bulan nu moncorong dina poe anu sarua.

Panghormatan nu seungit ka anjeun tina jero hate

nu nambah seungitna ku ayana ruh anjeun anu wangi.

Sarta aya nu nanya: "Naon anu anjeun pikasono?" kuring ngajawab

"Kuring sono ka Madinah ku rasa sono anu taya watesna."

Duh nu mawa kapal di awang-awang, turunkeun kuring upami parantos katingal

ku panon anjeun eta Kubah Hejo sarta kamar-kamar suci.

Di dinya kuring nuju ka jandela Rasulullah supados

nyuhunkeun ampun ka Allah di tempat anu dosa dihampura.

Mugia sholawat Allah tetep ka anjeun salila ditaratas

dina acara maulid anjeun ayat-ayat sarta surat-surat Al-Quran.

Sarta ka kulawarga, sahabat, sarta sakumna nu nuturkeun

oge ka Al-Ghauts, Al-Qutb, sarta para kakasih nalika maranehna hadir.