പ്രിയതമൻ ഹൃദയത്തിൽ കുടികൊണ്ടു, ഹേ ശരീരമേ സന്തോഷത്തോടെ വസിക്കൂ

ഈ അനുഭൂതിയാണ് എന്നെന്നേക്കുമായി നിലനിൽക്കുന്ന ആനന്ദം

പ്രിയതമൻ്റെ സംരക്ഷണയിൽ നീ എത്തിച്ചേർന്നു; പ്രിയതമൻ്റെ

അയൽവാസിയായി ആരു മാറുന്നുവോ, അവൻ്റെ ജീവിതം ഐശ്വര്യപൂർണ്ണമാണ്

അല്ലാഹുവിൻ്റെ സംരക്ഷണയിൽ, അവിടുത്തെ പതാകയ്ക്ക് കീഴിൽ ജീവിക്കൂ

ഈ സാമീപ്യത്തിൽ ഭയമോ പ്രയാസമോ ലവലേശമില്ല

ദാരിദ്ര്യത്തെ ഭയപ്പെടേണ്ട, ആരുടെ കൈകളിൽ നിന്നാണോ

സകല ആഗ്രഹങ്ങളും സഹായമായി ലഭിക്കുന്നത്, അദ്ദേഹത്തിൻ്റെ അരികിലാണ് നീ

സൗന്ദര്യത്തിൻ്റെ നാഥനും ഔദാര്യങ്ങൾ വർഷിക്കുന്നവനുമാണദ്ദേഹം

സർവ്വ ഗുണഗണങ്ങളിലും അദ്ദേഹം അതുല്യനും ഏകനുമാകുന്നു

ജ്ഞാനത്തിൻ്റെ കേന്ദ്രബിന്ദുവും സർവ്വലോകങ്ങളുടെയും അഭയവുമാണദ്ദേഹം

നേതൃത്വം നൽകിയവരിൽ അത്യുന്നതനും സ്തുതിക്കപ്പെട്ടവനുമായ അഹ്‌മദ്‌ നബി

പ്രപഞ്ചത്തിൻ്റെ ആത്മാവും സകല ജീവജാലങ്ങളുടെയും ജീവനുമാണദ്ദേഹം

അദ്ദേഹമില്ലായിരുന്നുവെങ്കിൽ ഈ പ്രപഞ്ചം പൂർണ്ണത കൈവരിക്കില്ലായിരുന്നു

ഈസയും ആദമും മറ്റ് പ്രമുഖരായ പ്രവാചകന്മാരുമെല്ലാം

കണ്ണുകളെപ്പോലെയാണ്, അദ്ദേഹം ആ കണ്ണുകളിലെ പ്രകാശവുമാണ്

പിശാച് ആദമിൻ്റെ മുഖത്ത് തിരുനബിയുടെ ആ പ്രകാശം

ദർശിച്ചിരുന്നുവെങ്കിൽ, ആദ്യമായി സാഷ്ടാംഗം പ്രണമിക്കുന്നത് അവനാകുമായിരുന്നു

നംറൂദ് ആ സൗന്ദര്യത്തിൻ്റെ തിളക്കം കണ്ടിരുന്നുവെങ്കിൽ

ഇബ്രാഹിം നബിയോടൊപ്പം അല്ലാഹുവിനെ അവൻ വഴിപ്പെടാതെ ആരാധിക്കുമായിരുന്നു

എന്നാൽ അല്ലാഹുവിൻ്റെ സൗന്ദര്യം അത്യുന്നതമാണ്, അത് ദൃശ്യമല്ല

നിരാശ്രയനായ അല്ലാഹുവിൻ്റെ സവിശേഷമായ അനുഗ്രഹത്താലല്ലാതെ

നിൻ്റെ ഉള്ളിൽ വസിക്കുന്നവനെ ഓർത്ത് സന്തോഷിക്കൂ

ആഗ്രഹങ്ങളെല്ലാം സഫലമായി കണ്ണുകളും കൈകളും നിറഞ്ഞവനേ

വിശ്വസ്തതയുടെ സത്തയും പരിശുദ്ധിയുടെ പൊരുളും ഔദാര്യത്തിൻ്റെ രഹസ്യവും

സന്മാർഗ്ഗദീപവും വിവേകത്തിൻ്റെ ആത്മാവും നേർവഴിയുടെ രൂപവുമാണദ്ദേഹം

സകല നന്മകളും ഒരുമിച്ചുചേർന്ന ആ തിരഞ്ഞെടുക്കപ്പെട്ട പ്രവാചകൻ്റെ മേൽ

അനന്തകാലത്തോളം അല്ലാഹുവിൻ്റെ രക്ഷാശീർവ്വാദങ്ങൾ ഉണ്ടാകട്ടെ