Ry fofona masin'Andriamanitra, ry fanehoam-pitiavany

Ry sinton'ny Fahamarinana, omeo fitsidihana izahay

Ry fijerin'Andriamanitra, ry fitsinjovany masina

Ry tsiokan'ny fahalemem-panahy, tongava mitondra fahasoavana

Ry famonjen'ilay Be Famindram-po, tongava haingana

Atỳ aminay, ary vahao ny fatotry ny fahoriana rehetra

Ry famindram-pon'ny Tompo be fiantrana, mitodiha

Ary velomy amin'ny fanahin'ny fahasoavana ny zava-drehetra efa lo

Ry varavaran'ny fankatoavana rehetra, mivahala

Fa ny fanirian'ny fo dia efa miantefa any aminao

Ry rahon'ny fahalalahan-tanan'Andriamanitra, milatsaha

Fa ny tanan'ny haintany dia mitsotra miandry anao

Noho ny voninahitr'ilay mpitari-dalana sy mamelona ny fonay

Ary mpanoro anay ny lalana mahitsy sy marina

Niantso antsika ho amin'ny fahamarinana izy tamin'ny fahamarinana nambara

Taminy avy amin'ilay Be Famindram-po, dia antso tsara indrindra

Namaly izahay, nanaiky ary nilefitra tamin'ny didiny

Nandre sy nankatò izahay tamim-pahazavana sy fahamalinana

Ry Tompo ô, mampahareta anay amin'ny fahamarinana sy ny tari-dalana

Ary ry Tompo ô, ampanjariho amin'ny finoana tsara indrindra ny fiafaranay

Ary akambano amin'ny famindram-ponao ny ray aman-dreny sy ny taranaka

Sy ny fianakaviana, ny namana ary ny havana rehetra

Ary ny mpino rehetra eo amin'ny silamo

Izay nankato ny maha-tokana Anao tsy misy fisalasalana

Ary dindony fitahiana sy fiadanana mandrakizay

Ilay tsara indrindra nirahina ho an'ny vahoaka tsara indrindra

Dia i Muhammad, izay nofidinao manokana tamin'ny fahasoavanao

Lehibe, sy ny fampidinana ny Boky ary ny fahendrena